uts | press releases

UTS ta dediká na sigui mehorá
su servisio na kliente

Klientenan pronto lo tuma nota di e diferensianan positivo.

Na promé lugá, nos ke gradisí abo, nos kliente di a skohe nos, UTS, nos kompania nashonal di telekomunikashon, komo bo proveedor. 26 di mart 2018, UTS ta kumpli 19 aña brindando servisio na komunidat di Kòrsou. Sá ku nos ta dediká na brindabu e mihó servisio tur dia di nobo, p’asina fasilitá bo bida ku e mihó konekshon riba tereno di telekomunikashon. Den nos afan pa sigui mehorá servisio na klientenan, nos ta implementando kambionan nesesario pa por logra esaki. Klientenan lo kuminsá tuma nota di forma inmediato di kambionan positivo manera entre otro:

• ‘After Service Call’: pro-aktivamente nos lo yama klientenan ('steekproefsgewijs') ku mester a risibí bishita di nos na kas pa asistensia, pa un 'follow-up' kòrtiku di kon a eksperensiá e asistensia di nos personal. E kliente ta liber pa kompartí ku nos kualke 'feedback'. E informashon balioso aki nos lo usa pa sigui mehorá nos servisio.
• SMS: si akaso un kliente a drenta den kontakto ku nos telefónikamente via 9242, e lo por risibí un mensahe di teksto (SMS) di nos kaminda nos ta gradisié pa a tuma kontakto ku nos i nos ta sigur'é ku nos tei pa sirbié.
• Tempu di espera: nos ta hasiendo nos máksimo esfuerso pa hasi nos tempu di espera mas kòrtiku via nos number di kontakto 9242, na nos Customer Service Center na Colon i tambe na nos Helpdesk walk-in na Brievengat. Nos ta pidi komprenshon di nos klientenan, ya ku no ta tur biaha esaki ta kompletamente den nos man. Por ehèmpel, na momentu di mal tempu òf kualke interupshon, esaki por influensiá e tempu di espera. No opstante esaki, nos lo traha debidamente pa trese kambio den esaki tambe.

Pa fasilitá nos klientenan ku sa tuma kontakto ku nos pa por ehèmpel informashon di saldo, nos kier rekòrdá nan ku via www.miuts.cw, nan por registrá pa risibí nan fakturanan di forma digital. Di e manera aki nan ta sigurá di haña esakinan na tempu i asina evitá kualke inkumbiniensia. Pa saldo di kuenta i tambe e maneranan pa hasi pago nan por bishitá www.uts.cw/outstanding i www.uts.cw/paymentoptions

Ademas, nos ke kòrda klientenan riba 'Bo opinion ta konta', kaminda klientenan por duna nan opinion ‘online’ tokante e servisio ku nan a risibí di UTS su personal. UTS sigur ta balorá opinion di su klientenan i ke tende di nan kon nan ta eksperensiá e servisio ku UTS ta duna nan. Empleadonan di UTS ku ta duna servisio, lo entregá kada kliente un tarheta ku su informashon (nòmber i departamentu kaminda e ta traha) riba e parti dilanti i riba e parti patras, akseso na www.uts.cw/boopinion. Klientenan por subi e website aki i yena un enkuesta di 8 pregunta tokante e kalidat di e servisio ku el a kaba di risibí. UTS lo hasi uso di e informashon risibí pa mehorá su servisio.

UTS ta perkurá pa por disponé di e mihó den teknologia, produkto i servisio di kalidat i na preis pagabel, pero aparte di esaki, ta sigui hasi su máksimo esfuerso tambe pa sigui halsa e kalidat di e servisio duná na su klientenan. Bishitá nos wèpsait www.uts.cw pa mas informashon, nos oferta i kampañanan i muchu mas. Tira un bista diariamente pa bo keda bon informá.

»Return to Press Releases