Willemstad, Curaçao – 22 di aprel, 2021: Cable & Wireless Communications (C&W), kompania mama di Flow i UTS, ta hasi yamada pa mas mucha muhé sigui estudionan den Siensia, Teknologia, Ingenieria i Matemátika (STEM) miéntras e kompania ta pone atenshon na e dia internashonal di Girls in ICT Day
E kompania ta ranka sali ku diferente aktividat den region pa enkurashá studiantenan femenino pa konsiderá un profeshon den e industria di Informashon, Komunikashon i Teknologia (ICT).
E espasio di ICT ta sigui evolushoná rápidamente, i ta habri un gran kantidat di oportunidatnan di trabou. Sinembargo tin ainda preokupashon pa ku e representashon abou di hende muhé den e sektor.
“Globalmente e porsentahe di hende muhé ku ta sigui un estudio den edukashon STEM ta abou. P’esei ‘Girls in ICT Day’ ta un oportunidat pa nos sigui konektá nos hende muhénan hóben, proveé mèntor, i ilustrá e diferente profeshonnan den e sektor, miéntras ta konektá nan ku pioneronan femenino den e industria. Segun nos ta sigui boga pa mas inklushon i diversidat den e área di trabou, nos ta konsiente di e nesesidat pa mas balansa i representashon di hende muhé den nos industria, i asina nos aktividatnan e aña aki ta enfoká riba e propósito aki,” Inge Smidts, CEO di C&W, un proveedor lider di komunikashon i entretenimentu, i alabes un di e dunadónan di trabou mas grandi di ICT, ingenieria i otro trahadónan tékniko den e region, a indiká.
C&W lo tin un kompetensia di video pa studiantenan femenino di 12 pa 15 aña den region. Partisipantenan lo mester entregá un video di 2 pa 3 minüt riba e tópiko: “Dikon ta importante pa muchanan muhé/hende muhé sigui un karera den ICT?”
Detayenan di e kompetensia lo keda kompartí riba 26 di aprel i ganadónan lo keda anunsiá durante e forum “Girls in ICT” riba 8 di yüni 2021.
“Subi e kantidat di hende muhé den ICT lo rekerí un esfuerso kolektivo. Na C&W, nos ta hasi nos parti pa krea un industria mas balansá dor di duna sosten na muchanan i hóbennan muhé den region segun nan ta hasi eskohonan krusial pa ku e trayekto di nan profeshon. Pa medio di e kompetensia aki di video i durante e forum di ‘Girls in ICT’, nos ta spera di krea konsientisashon riba e oportunidatnan disponibel na nos hóbennan muhé i muchanan muhé, proveé medionan pa yuda nan den nan trayekto pa nan futuro profeshon, i kompartí eksperensianan di lidernan femenino ku trayektoria den e industria,” Smidts a kontinuá.
“Flow/UTS den Karibe Hulandes, tin e suerte di konta ku un grupo di damanan sumamente kapasitá ku ta den funshonnan di IT. Asina tambe nos ta kontentu di tin vários di nan ku a kore stazje serka nos i ku den transkurso di añanan a keda i a bin forma parti di e kompania. Nos ta sigur enkurashá mas diversidat den e industria aki pa hende muhénan ku ta deseá di eksplorá e área dinámiko aki”, tabata palabranan di Danny Macaya, Country Manager pa Flow, Karibe Hulandes.
Durante añanan, C&W a organisá vários aktividat i a uni ku diferente organisashon pa ‘Girls in ICT Hackatons’ segun e a sigui lucha pa oumentá e kantidat di studiantenan femenino den ICT den Karibe.
Girls in ICT Day 2021 ta karga e tema “Connected Girls, Creating Brighter Futures!” , esta “Muchanan muhé konektá, kreando futuronan mas briante!” E dia aki ta un inisiativa di International Telecommunications Union (ITU), kua ta dediká na empoderá i enkurashá muchanan muhé hende muhénan hóben pa sigui un edukashon STEM, inspirando nan pa traha den profeshonnan STEM miéntras ta involukrá e komunidat i tambe promoshoná kolaborashon via di partnerships.
© 2017 UTS N.V. All rights reserved.